Dende Darréu, como organización qu’asume
l’ecoloxismu dientru de los finxos ideolóxicos nos que trabayamos, nun podemos
quedar pasivos énte lo evidente: baxo’l mitu del “Paraísu Natural”, atopamos
agresiones constantes al nuesu entornu natural, y al mediu ambiente. Llinies
d’alta tensión, centrales térmiques, amenaza de nueves esplotaciones mineres
auríferes,flora y fauna autóctono amenazao, proyeutos de banzaos o
incineradores que nun quedaron torgaos dafechu, el retornu del fracking, o los
alarmantes niveles de contaminación nel aire, son dalgunes de les amueses más
importantes.
Ye por ello que, col enfotu de siguir
faciendo conciencia d’esta realidá, y tamién de conocer meyor l’entornu natural
del nuesu país, entamamos una nueva Marcha Moza en Defensa de la Ñatura pal 29
de xineru dende les 10:30 hores, que nesta ocasión va percorrer la Ruta l’Alba
dende Soto d’Agues (Sobrescobiu) (nel aparcamientu asitiáu a la entrada’l
pueblu). Na mesma, amás de la propia marcha, van intercalase delles actividaes
y talleres venceyaos a la cuestión ecolóxica dende una perspeutiva moza.
Pa una meyor organización de l’actividá, ye
necesario inscribise en darreu.moceda@gmail.com,
apurriendo nome, apellíos, y teléfono de contautu p’avisar en casu d’aplazamientu
por mal tiempu, cuestión que tamién avisaremos nes nueses redes sociales.
L’actividá ye accesible y abierta a tol mundu, recordando la importancia de
llevar bocadiellu o daqué pa xintar, asina como ropa afayaíza pa esti tipu
d’actividá. Si nun cuntes con mediu de tresporte p’acudir, ¡contauta con nós!
¡El nuesu mediuambiente nun ta en venta!
¡La mocedá en defensa de la ñatura!
No hay comentarios:
Publicar un comentario