¿Qué ye Darréu?

Darréu- Mocedá d'Izquierda Soberanista- ye una muerganización política asturiano de mocedá.
Defínimosnos soberanistes y d’izquierdes, anguañu somos la muerganización política referente del soberanismu/nacionalismu asturianu d’izquierdes na so estaya xuvenil.

Darréu ye una organización por y pa la mocedá. Asina trata de defender perenriba de too los intereses de la mocedá asturiano. Darréu quier ser la espresión política de los esmolecimientos, pruyimientos y problemátiques de les moces y mozos d’Asturies y xenerar alternatives polítiques alcordies cola rialidá d’esta mocedá.

La organización Darréu encuadrase dientru d’un movimientu más ampliu en defensa de los drechos nacionales d’Asturies. Darréu trata de ser una ferramienta política pa los mozos y moces que traten de lluchar pola soberanía, l’autodetermín y la independencia del nuesu país. Trata de ser la voz moza d’un sentir dientru’l Pueblu Asturianu qu’apueste pola reconstrucción nacional. Darréu caltién qu’Asturies ye una nación estremada y que-y correspuenden plenos drechos nacionales. Darréu cree que la llingua asturiana ye la seña cimera de la identidá asturiana polo que vindica la so oficialidá como llingua nacional, tamién seña d’identidá coleutiva nacional ye’l restu’l padremuñu, que la organización xuvenil llama a defender de les agresiones del Estau español.

Al tiempu, Darréu ye una organización d’izquierda revolucionaria. Poro, defende’l socialismu y los drechos de clas del Pueblu Trabayador Asturianu, drechos irrenunciables si se quier algamar una Asturies llibre dafechu, ensín privilexios nin desigualdaes, ayena al imperialismu y capitalismu. Darréu ye una organización internacionalista que sofita les lluches d’otros pueblos del mundiu a la gueta de la so xusticia social y nacional. Darréu entiende que les relaciones internacionales tienen que tener los valores del respetu, la solidaridá, la soberanía y la fin del orden vixente capitalista, qu’oprime a los pueblos del mundiu. Como anticapitalistes Darréu quier finar coles sos espresiones más estremes como’l facismu o la xenofobia, y camienta que movimientos d’esta índole son armes del capital pa frenar la organización del Pueblu haza’l cambeu social, políticu y económicu.

La dinificación de la muyer na sociedá tamién ye un perimportante esmolecimientu pa la organización. Darréu ye antipatriarcal y feminista y defende que les muyeres tienen que tener el mesmu papel na sociedá que l’home, ensín dengún tipu de prexuiciu, nin distinción. Tamién Darréu enfotase cola normalización ente la mocedá de les distintes tribes afeutives y sexuales y puxa polos drechos del coleutivu LGTB.

Otru pegoyu importante n’actividá de Darréu ye facer ver qu’otra Asturies ye posible nel tarrén medioambiental. L’apueste por una Asturies sostenible, ye l’apueste pa Darréu por una Asturies que se respete a si mesma y respete la ñatura, polo que Darréu ye una organización de calter ecoloxista.

Darréu quier poner tol esfuerciu en xenerar espacios propios, texíu organizativu y bás social que sofite les tesis ideolóxiques de la izquierda nacional asturiana y qu’esa coleutividá acompangue a Darréu na llucha político diario. Trata d’espertar una concenxa ente la mocedá p’asina crear un movimiento ampliu de resistencia, de compromisu independentista y d’izquierdes.


Darréu ye una organización soberana, horizontal y asamblearia, abierta a la participación toles moces y mozos que compartan los sos éntamos mínimos faciendose miembros de la organización o colaborando como simpatizantes nes actividaes de la organización.

INDEPENDENCIA Y SOCIALISMU

No hay comentarios:

Publicar un comentario