jueves, 21 de septiembre de 2017

Pol drechu a decidir, pol internacionalismu: tamos cola llucha del pueblu catalán


Nos últimos díes tamos viendo cómo la mázcara del Estáu español ta cayendo dafechu: la demanda del pueblu catalán de dalgo tan simple como poder votar el so futuru, ta dexando unes consecuencies bien contundentes: detenciones, rexistros arbitrarios n’imprentes, medios de comunicación, sées d’organizaciones polítiques… asina como un despliegue policial esaxeráu, y l’intentu d’intervención económica dende’l gobiernu central.

Énte ello, vemos un movimientu popular cada vegada más decidíu a siguir alantre cola so demanda d’autodetermín, a nun dexase pisar pola bota policial ya institucional d’un Estáu español que quier ganar pela fuercia lo qu’enxamás quixo ganar per otres víes, amosando asina qu’en cualquiera de les sos formes, acaba siempres na sienda de l’aculturización y la negación de la soberanía de los pueblos.

Dende la Mocedá d’Izquierda Soberanista paeznos imprescindible solidarizanos y sofitar la llucha del pueblu catalán, porque yá nun ye namái una cuestión d’independentismu sí o non: los atropellos y actos represivos que permitamos güei en Catalunya, van afectanos mañana n’Asturies y nel restu de pueblos que componen esti Estáu.

De la mesma manera, les breches que güei consiga abrir el pueblu catalán, van trayer incertidumes y oportunidaes que tamién mos van a afectar pa bien o pa mal: puede abrise una escena na que poder avanzar nel camín de la soberanía p’Asturies, pero si nun tamos sollertes y organizaes, esa incertidume puede tornase a la nuesa contra en forma de recentralización y ofensiva aculturizadora. Poro, ye perimportante güeyar estos fechos dende una perspeutiva internacionalista, con tolo qu’ello implica: tar atentes a lo de fuera, pero tamién a lo de dientro’l nuesu país, y sobre too: organizaes pa reaicionar en dambes vertientes.

Nesi sen, queremos manifestar una vegada más el nuesu sofitu y solidaridá pa cola llucha del pueblu catalán, afitando la nuesa identificación col proyeutu de la Esquerra Independentista: construyir unos Païssos Catalans dende’l socialismu y el feminismu, con un proyeutu de clase y emancipador en tolos aspeutos, que tresciende una simple llucha pola independencia formal.

Tamos pol drechu a decidir de tolos pueblos que componen l’Estáu español, tamos pol movimientu popular que llucha por algamar la xusticia social y una verdadera democracia, tamos polo tanto col pueblu trabayador de Catalunya y cola so mocedá combativo.

lunes, 11 de septiembre de 2017

Un 8-S na cai, una mocedá por un país nuevu



El pasáu vienres salimos a la cai pa facer visible una vegada más la reivindicación social y nacional al traviés de los actos entamaos por Lluchando Pola Soberanía. Na manifestación fízose visible la participación de dellos coleutivos sindicales, centros sociales, reivindicación LGTB, estudiantil, antirracismu, drechu a la vivienda digno... espeyando asina qu'eses lluches vieyes, esa tradición de la clase trabayadora asturiana, sigue bien viva al traviés de diverses iniciatives y sensibilidaes.

Pela nuesa parte, participamos dende la óptica xuvenil, con una intervención política al final de la manifestación na que ficimos repasu a los problemes que sigue careciendo la mocedá asturiano, pero poniendo especial enfotu na necesidá de nun cayer nel pesimismu y siguir enanchando les lluches dende la mocedá. Amás d'ello, punximos el nuesu puestu d'información y material, tanto na xinta popular posterior a la manifestación, como nel conciertu entamáu pola Casa Conceyu de Riosa nesa mesma tarde-nueche.

Asina, un 8-S más quedó nidio qu'hai otra Asturies distinta a la de l'autocomplacencia institucional, l'aculturación, y la miseria: de l'Asturies que nun se rinde, y llucha por un país consciente y arguyosu de la so identidá, con concencia de clas, y decidíu a frayar con llaceries como'l capitalismu, el patriarcáu, o la falta de soberanía de los pueblos que componen l'Estáu español.

Como cada añu, esti 8 setiembre podemos ver la esistencia de dos visiones contrapuestes nel nuesu país: per un llau la oficial, institucional y del poder que mos amuesa esta fecha y Asturies en xeneral dende una perspeutiva folclórica, idílica y que defín al nuestru país como una rexón periférica y venceyada al españolismu, pa lo qu'emplega los mitos cuadonguistes más rancios. Per otru llau ta l’Asturies que nun se rinde, qu'apuesta por sí mesma y pol so Pueblu pa construyir un país xustu, más llibre y que nun s'avergoña de la identidá nacional asturiana nin de la necesidá de superar el capitalismu y el patriarcáu.

Pa la mocedá asturiano nun hai alternativa a la hora d’escoyer: esa Asturies oficial, la del sucursalismu, la del paru, la de la precariedá, la de la emigración forzada, supón miseria y falta de futuru pa nós, mozos y moces. Poro, como dicimos, hai namái una vía si queremos algamar un futuru dignu nel nuesu país: apostar pol camín de la soberanía del Pueblu Trabayador Asturianu y, poro, p’Asturies.
Nun hai munches novedaes positives que cuntar sobre la situación de la mocedá asturiano: el paru sigue tando nunes tases de les más elevaes d'Europa, la temporalidá sigue suponiendo más del 90% de los nuevos contratos firmaos, los puestos de trabayu esistentes carauterícense pola precariedá... con too ello, les nueses posibilidaes d'emancipanos, algamar vivienda digno, y en definitiva vivir y trabayar nel nuesu país nunes condiciones afayaíces, ye una utopía pa la mayoría de moces y mozos, condergaos a la emigración forciada.

Y yá si axustamos un poco más el focu, vemos que nel casu de les moces la situación ye entá pior: la brecha salarial esistente nun dexa de medrar y llidera les estadístiques estatales; los casos de violencia y acosu machista, per desgracia, nun mengüen ya incluso medren, y asistimos en resume a les desgracies causaes por un sistema patriarcal nel que les muyeres enxamás van algamar la igualdá y, polo tanto, ye necesario siguir lluchando y concienciando pa superar esa cadarma opresora y opresiva.

Ye por ello qu'entendemos qu’un 8 de setiembre más, hai que convertir esta fecha nun día nel que dexar bien claro que la vindicación de soberanía política y económica ye'l camín d'Asturies énte tanta imposición ayena a los intereses de les y los trabayadores d'esti país. El camín d'Asturies ye'l de la soberanía y el socialismu, y ye que paeznos bien claro que creyer posible la soberanía del nuesu pueblu dende parámetros capitalistes, nun ye más qu'una broma de mal gustu qu'eso sí, vendría perbién a les estructures que güe nos someten: el Reinu d’España, la Xunión Europea, y la propia Xunta Xeneral.

Ye por ello que tamos equí xunto a toles y tolos que creyemos posible y necesariu un cambiu social, y nós tenemos bien claro qu'esi cambiu requier de la construcción d'un país nuevu, de construyir la nuesa soberanía, pero ensin escaecer quién somos, nin d'ónde venimos como pueblu.
Un añu más, 

PUXA LA LLUCHA DE LA MOCEDÁ
PUXA ASTURIES LLIBRE, SOCIALISTA Y FEMINISTA

martes, 5 de septiembre de 2017

8-S: Un país nuevu, un futuru dignu pa la mocedá asturiano



 Como ye vezu, l’8 Setiembre d’esti añu vamos asistir a les dos visiones, dicotómiques y poro contrapuestes, esistentes nel nuesu país: per un llau la oficial, institucional y del poder que mos amuesa esta fecha y Asturies en xeneral dende una perspeutiva folclorica, idílica y que defín al nuestru país como una rexón periférica y venceyada al españolismu, pa lo qu'emplega los mitos cuadonguistes más rancios. Per otru llau ta l’Asturies que nun se rinde, qu'apuesta por sí mesma y pol so Pueblu pa construyir un país xustu, más llibre y que nun s'avergoña de la identidá nacional asturiana nin de la necesidá de superar el capitalismu y el patriarcáu.

Pa la mocedá asturiano nun hai alternativa a la hora d’escoyer: esa Asturies oficial, la del sucursalismu, la del paru, la de la precariedá, la de la emigración forzada, supón miseria y falta de futuru pa nós, mozos y moces. Poro, como dicimos, hai namái una vía si queremos algamar un futuru dignu nel nuesu país: apostar pol camín de la soberanía del Pueblu Trabayador Asturianu y, poro, p’Asturies.

Entendemos qu’un 8 de setiembre más, hai que convertir esta fecha nun día nel que dexar bien claro que la vindicación de soberanía política y económica ye'l camín d'Asturies énte tanta imposición ayena a los intereses de los trabayadores d'esti país. El camín d'Asturies ye'l de la soberanía y el socialismu. Los niveles de miseria siguen medrando, igual que sigue’l secuestru de la nuestra soberanía como pueblu a los intereses del capital, representaos pol Reinu d’España, la Xunión Europea, y los propios axentes del españolismu asitiaos na Xunta Xeneral.

Nesi sen, entendemos que la movilización que s’axusta a estes premises ye la entamada pola iniciativa Lluchando Pola Soberanía, con entamu a les 12:30 nel Paséu Los Álamos. Ellí taremos participando, y llamamos a la mocedá asturiano a facer lo mesmo: convirtamos esti 8-S nun día de llucha y reivindicación que dexen bien claro que nin creyemos nin queremos el cuentu inventáu dende’l poder respeuto a esti día y a la so visión d’Asturies en xeneral.

[DMR 2017] XIV Asturies Nun Escaez


Torna un añu más el Día de la Mocedá Revolucionario, nel qu’actividaes formatives, reivindicatives, folixeres… axúntense col envís de facer alcordanza de los fechos d’ochobre’l 34 nel nuesu país, pero tamién pa reivindicar la necesidá de garrar exemplu pal nuesu presente, como preséu pa construyir el futuru que merez la mocedá del nuesu país.

Na parte musical del DMR nun podía faltar el XIV Asturies Nun Escaez, que nesta edición va tener llugar na uvieína Sala Sir Laurens (Cai Eugenio Tamayo 3) dende les 20:00. Como ye vezu, reivindicación y folixa van axuntase cola presencia de 4 grupos:

KAOS URBANO: Los madrileños necesiten poca presentación, con más de venti años enriba los escenarios y un bon puñáu de discos, nos que descarguen el so estilu streetpunk con mensaxes antifascistes y combativos. 

SKONTRA: El punk-folk fechu n’Asturies torna al Asturies Nun Escaez, repasando los temes que vienen faciendo d’ellos un referente de la nuesa escena. 

LOS MONSTRUITOS: Nel so primer conciertu n’Asturies, los andaluces nun van dexar indiferente a naide colos sos contundentes mensaxes marxistes-leninistes. 

OCHOBRE: El grupu más mozu de la escena punk-rock n’asturianu tamién va tener el so espaciu nel XIV Asturies Nun Escaez, y el mensaxe reivindicativu tampoco va faltar. 

Too ello esti 14 d’ochobre n’Uviéu, pa dexar bien claro un añu más que la mocedá del nuesu país NUN ESCAEZ. 

ENTRAES ANTICIPAES (8 EUROS):
-L’ENTREGU: Chigre Ochobre
-LA FELGUERA: Matteria
-UVIÉU: Pub La Luna, Chigre L’Esperteyu
-MIERES: L’Abellugu
-LA POLA SIERO: Diañu Rock Bar
-XIXÓN: Sidrería Canteli
-ONLINE: www.entradium.com

jueves, 24 de agosto de 2017

Conseyu Soberanu: 80 años d’alcordanza pa camudar el nuesu presente


Un 24 d’agostu de 1937 firmábase, pa entrar en vigor el día 25, el decretu pol que’l Conseyu Interprovincial d’Asturies y Lleón pasaba a convertise en “Conseyu Soberanu de gobiernu de tol territoriu de la so xurisdicción, y a él queden íntegramente sometíes toles xurisdicciones y organismos civiles y militares que funcionen y furrulen d’equí p’alantre dientro del referíu territoriu”.

Con esti decretu Asturies pasaba a asumir les funciones propies d’un estáu soberanu, emitiendo moneda y sellu propio, conformando estructures como fuercia armada propia –milicies populares y restos del exércitu republicanu-, policía o marina de guerra, y afitando un gobiernu dividíu n’estayes diverses, dende Guerra fasta Asistencia Social, Sanidá, Obres públiques, Xusticia, Agricultura o Comerciu.
Poro, tenemos nestos fechos, en plena guerra contra’l facismu, un exemplu más de la clase trabayadora como motor y propiu gobernante del nuesu país, con un fechu más a destacar: l’exemplu d’unidá de les distintes corrientes obreres, pesie a les naturales discrepancies estratéxiques que tamién pudieren surdir enantes, durante y depués.

Con too ello, dende la Mocedá d’Izquierda Soberanista reivindicamos como perimportante non namái recuperar y esparder estos y otros tantos fechos, sinon tamién dignificalos al altor de la so importancia. La memoria hestórica sigue siendo una estaya con abondes deficiencies nel nuesu país, quedando de mano d’iniciatives populares cualquier avance, énte la pasividá, cuando non refugu, del ámbito institucional.

Nesi sen, y tornando al contestu d’anguaño -distintu nes formes pero bien asemeyáu nel fondu- reivindicamos la soberanía como’l camín pa garantizar los nuesos intereses sociales y nacionales como pueblu, p’aparar el desmantelamientu industrial, el despoblamientu rural, la emigración forciada, el paru y precariedá xuvenil, la represión de les lluches y de la nuesa cultura y llingües, y demás problemátiques que mos imponen les ferramientes propies del capitalismu al que mos alfrentamos güei: dende los gobiernos sucursalistes y títeres de la probetaya autonomía asturiana, fasta’l propiu Estáu español, la Xunión Europea, la OTAN o’l FMI.

Recuperar la memoria y l’arguyu coleutivu de los bayurosos fechos de llucha popular y antifacista n’Asturies, asina como deprender d’ellos, ye parte fundamental nesi camín haza los finxos que güei reivindicamos p’Asturies: la soberanía política y económica, que namái’l socialismu puede garantizanos, xunto cola resquiebra del patriarcáu.

PUXA’L CONSEYU SOBERANU
ASTURIES NUN ESCAEZ

sábado, 5 de agosto de 2017

Respuenden con represión, nós con solidaridá



 
Estos díes dióse a conocer un nueu casu de represión, nesti casu coincidiendo cola visita de la reina española Letizia Ortiz al nuesu país, nel conceyu de Llangréu. Les fuercies policiales rexistraron a un mozu, casualmente militante en dellos espacios y movimientos sociales, llantándo-y una multa de 601 euros por llevar un llaveru en forma de puñu americanu, el cual por puru tamañu, ye evidente que nun puede servir como arma de nengún tipu.

601 euros de multa qu’amuesen una vegada más l’abusu y arbitrariedá exercíos poles fuercies policiales del Estáu español n’Asturies, onde davezu conocemos nuevos casos qu’afeuten a militantes del texíu contestatariu asturianu. Amás, vemos claramente cuál yera la “utilidá” ya intencionalidá d’esa tan denunciada Llei Mordaza: enanchar les posibilidaes represives, asina como’l tamañu de les sanciones impuestes, dando práuticamente un cheque en blanco a les fuercies represives pa proceder como-yos pete.

Dende Darréu sumámonos a la denuncia d’esti casu, y ye que nun país nel que la mocedá yá tien una perspeutiva bien complicada de por sí –paru, precariedá, emigración, falta d’accesu a vivienda digno…- , agora sumamos la posibilidá de ser sancionaos económica o incluso penalmente por práuticamente cualesquier cosa, fechu que nos paez intolerable dafechu nun contestu nel que la clase trabayadora siguimos perdiendo drechos y bientar, mentantu dende les clases dominantes nun faen más que ver medrar los sos privilexos y riqueces.

Por too ello, dende la Mocedá d’Izquierda Soberanista treslladamos el nuesu sofitu y solidaridá pa col mozu represaliáu. Nun podemos tolerar qu’esti tipu d’aiciones represives seyan de baldre o nun cunten cola rempuesta popular necesaria, más entá cuando se dan nel epicentru del desmantelamientu industrial y la falta de futuru, mentantu la institución monárquica española caleya ayena a too ello, cola complicidá institucional.

domingo, 30 de julio de 2017

Darréu nel Día da Patria Galega


Darréu tuvo presente esta selmana nes actividaes rellacionaes col Día da Patria Galega en Santiago, siendo convidaos poles organizaciones moces Briga y Isca. Esti alcuentru foi una bona oportunidá d’averamientu a otres realidaes nacionales del Estáu, yá que tamién hebo representantes de Ernai, Yesca, Jaleo y Arran.

Ellí asistimos a tolos eventos entamaos, como una concentración y una cadena humana a favor de la lliberación de los presos independentistes gallegos, una manifestación pola independencia, charres perinteresantes y actos de solidaridá con otres naciones, asina como conciertos y xintes en compañía de toles delegaciones.

Dende Darréu queremos agradecer a los nuestros compañeros gallegos el convite a esta xornada de llucha, asina como felicitalos pol so resultáu. ¡Puxa Galiza llibre! ¡Puxa la solidaridá internacionalista!