martes, 24 de octubre de 2017

Pol futuru y la viabilidá de Duro Felguera


Esti miércoles 25 a les 19:00 na Plaza L’Humedal (Xixón), los y les trabayadores de Duro Felguera vuelven a salir a la cai, una vegada más, como tantes nestes décades: la situación económica de la empresa pon en peligru la so continuidá y, sobre too, la de los puestos de trabayu, otru casu más nel ermu industrial y económicu al que sigue empobináu Asturies énte la pasividá institucional y sistémica.

Nun ye l’únicu casu de movilización obrera esistente n’Asturies, pero sí cunta con gran importancia. Ye especialmente sangrín pola trayeutoria de claru desmantelamientu carecíu nestos años: pieslles como’l del taller de Barros, Calderería, Felguera Melt, Tedesa… vienen dexando cientos de persones nel paru, mentantu nos vendíen la “exemplaridá” d’esta empresa. Exemplaridá que vemos nel cartel de repartu de contratos pa obres del AVE, pol pagu de sobornos n’otros estaos, y por pesllar y despedir ensin reparu. 

La reconversión industrial, el desmantelamientu, la xestión de los fondos mineros, les deslocalizaciones empresariales… amuesen el fracasu que’l capitalismu supón p’Asturies y la so economía. Siguir dexando nes manes de la “iniciativa privada” el futuru d’esti país, equival a condergalu a un presente y un futuru escuru. Nun vamos esixir lo que sabemos imposible: que les instituciones asturianes garren la iniciativa. Pero sí puxamos por que’l pueblu siga garrando conciencia nesi sen, pa facelo elli mesmu: soberanía política y económica, de les clases populares, pa les clases populares.

Tamién hai que destacar la iniciativa autoorganizada d’Asamblea de Trabayadores, desbordando asina a les cúpules burocrátiques y cómplices patronales d’UGT y CC.OO. El camín ye la llucha de la clase obrera, pol futuru de los puestos de trabayu, pol futuru d’Asturies, pa que l’ermu nel que nos quieren convertir nun cumpla un capítulu más.

lunes, 16 de octubre de 2017

Crónica del DMR 2017



Les actividaes del Día de la Mocedá Revolucionario 2017 entamaron el vienres 13 nel Llar La Llegra, onde hebo un alcuentru-homenaxe con Maximino Roda, ún de los "neños de la guerra", qu'en 1937 colaron d'Asturies rumbu a la URSS: los "refuxaos" d'aquella época. Yá na URSS, participó nel  como voluntariu del Exércitu Roxu, clave pa la defensa de Leningrado. Too ello foi repasao nel documental de Luis Felipe Capellín proyeutáu pa la ocasión, asina como nel posterior alcuentru col propiu Maximino Roda, qu'esplicó de primera mano les sos esperiencies y respondió a toes aquelles entrugues de les presentes. Pa rematar, dende Darréu quiximos dá-y el nuesu homenaxe y reconocimientu entregándo-y una plaquina.



El DMR siguió na mañana del sábadu 14 na Plaza'l Paragües, onde entamamos col alcuentru internacionalista dedicáu a la cuestión del turismu dende una perspeutiva xuvenil. Les delegaciones d'Isca, Briga, Jaleo! y Ernai desplicaron la realidá d'esta cuestión nel so país, habiendo tamién espaciu pa una esposición del tema dende la perspeutiva asturiana a cargu de Darréu. Posteriormente desendolcóse un interesante alderique, pa dar pasu a la xinta popular na mesma plaza.



Yá pela tarde tuvo llugar el percorríu hestóricu pelos llugares más importantes de la revolución d'ochobre'l 34 n'Uviéu, a cargu d'Adrián Gayo de la Fundación Juan Muñiz Zapico. Una perbona ocasión p'afondar nel conocimientu d'estos fechos tan importantes pa la clas obrera asturiana, dende los mesmos llugares onde asocedieron.



Pa rematar les actividaes del DMR 2017, el conciertu XIV Asturies Nun Escaez na Sala Sir Laurens, onde Ochobre, Los Monstruitos, Kaos Urbano y Skontra enllenaron la nueche de música y reivindicación, habiendo tamién espaciu pa una pequeña intervención política cola presencia de les delegaciones internacionales.




Fina asina una nueva edición del Día de la Mocedá Revolucionario, conxuntu d'actos colos que dende Darréu queremos siguir faciendo'l nuesu homenaxe dende l'ámbitu xuvenil a la revolución asturiana de 1934, pero al mesmu tiempu tamién reivindicar pol presente y pol futuru d'Asturies, qu'anguaño más que nunca requier del compromisu, la llucha y la implicación de cuanta más mocedá meyor.

Gracies a les delegaciones desplazaes, a tola xente que participasteis nes actividaes, a los grupos musicales, y a la mocedá militante por facelo posible un añu más.

¡Puxa la llucha xuvenil!
¡Puxa ochobre'l 34!




jueves, 12 de octubre de 2017

12-O: Contra la reaición españolista, pueblos llibres y soberanos



Esti 12 d’ochobre ye imprescindible facese oyer. Siempres lo ye, cuntando cola importancia de refugar esta “cellebración” qu’asoleya lo pior del españolismu, d’esi conceutu d’”hispanidá” que fiede a señaldá imperialista d’un pasáu colonial que, anque anguaño yá nun ye tal nes mesmes formes, sigue cuntando coles sos reminiscencies y venceyos nun sufríu tarrén llatinoamericanu onde les inxerencies siguen presentes dende distintos frentes.

Y dicimos que ye imprescindible facese oyer porque tamos asistiendo a una evidente ofensiva del nacionalismu español, con tolo qu’ello conlleva: centralismu, intolerancia, aculturación, represión… reaición que tien como motivu principal lo asocedío en Catalunya nes caberes selmanes: la llucha pol drechu a decidir que vien sacando a les cais y a les urnes a millones de persones.

Ante esta situación, dende Asturies nun podemos tolerar la intensificación de lo que yá venimos careciendo dende cuantayá. En formes esplícitamente dictatoriales, o nes de la democracia burguesa, n’Asturies sabemos bien lo que ye que se torguen les nueses manifestaciones llingüístiques y culturales, que nun se nos dexe votar les nueses ferramientes estatutaries o qu’estes tean nun nivel probetayu de desarrollu. Tamién sabemos perbién lo que ye’l desmantelamientu del nuesu texíu económicu, impuestu dende fuera, o carecer esa institución humildante del “Principado”.

Paeznos que’l 12 d’ochobre y lo qu’arreciende d’elli, representa too esto que combatimos. Y como nun podemos quedar nel simple “non”, reivindicamos y contraponemos l’alternativa al centralismu, l’aculturación, el sucursalismu, la represión, y la esplotación: el camín de la soberanía del pueblu trabayador asturianu, y de tolos demás pueblos que componen l’Estáu español. Valtiar lo que queda d’esi imperiu, no material y nel tarrén de les idees. Valtiar col sistema capitalista que caltién, y construyir l’alternativa socialista. Acabar d’una vegada con un panorama d’ofensiva reaccionaria y algamar l’empoderamientu popular pol que tantes naguamos, y que ta tan torgáu que nun se permite nin votar sí o non nun referéndum.

Por too ello, el nuesu refugu al 12 d’Ochobre y a tolo que representa. El nuesu ochobre ye’l del pueblu trabayador qu’en 1934 irguióse n’Asturies, o qu’en 1917 fizo lo propio n’otres tierres pa construyir la Unión Soviética, non el de la reivindicación del imperialismu, el xenocidiu, l’aculturación y la opresión.

PUXA LOS PUEBLOS LLIBRES Y SOBERANOS

miércoles, 4 de octubre de 2017

1934-2017


Va 83 años taba a piques d’entamar a facese realidá ún de los episodios más importantes protagonizaos pola clase obrera del nuesu país: la revolución asturiana d’ochobre de 1934.
Les fuercies obreres de distinta seña (comunistes, anarquistes, socialistes…) asaltaron cuarteles de la Guardia Civil y otros centros de poder, faciendo real el poder obreru nes cuenques mineres y práuticamente tola zona centro durante cerca 15 díes, enantes de que la represión a cargu del gobiernu español vixente d’aquella fixere cayer tol so pesu represivu sobre’l nuesu pueblu, incumpliendo l’alcuerdu algamáu col cabezaleru Belarmino Tomás (que según les sos propies pallabres, negociaba en calidá de xeneral del exércitu revolucionariu).

Dende Darréu, otru añu más –y los que faigan falta- siguimos enfotaos en reivindicar estos fechos y esta revolución obrera, que suel considerase la cabera d’Europa hasta la fecha. Facémoslo, como nun podría ser d’otra manera, en primer términu dende la reivindicación hestórica: recuperar y poner en valor la nuesa memoria ye clave, deprender de les esperiencies del pasáu p’aprovechar lo treslladable al contestu d’anguaño, y tamién denunciar y nun escaecer la represión sufría. Nesi sen ye importante señalar el papel de la II República, qu’espeyó nestos fechos les sos llimitaciones: con ello naguamos pola fin de la idealización esistente n’importantes ámbitos de la esquierda española, reconociendo los aspeutos positivos derivaos de la llucha popular nesti periodu pero tamién siendo claros nos erros y contradicciones, que nesti casu costaron el sangre de miles d’asturianes y asturianos.

Amás d’esti aspeutu hestóricu, tamién facemos reivindicación dende’l presente y el futuru: garrar exemplu de la combatividá, l’autoorganización, la xunidá obrera, la conciencia de clas y antifacista… en definitiva d’una bona riestra de valores y exemplos que podemos y debemos recuperar nesti momentu presente, nel que la situación social, política, económica… del nuesu país y de la nuesa clase son perdifíciles. Nesti contestu paeznos imprescindible la llucha contra’l sistema capitalista, pero tamién contra’l sucursalismu y la falta de capacidá de decisión en tolos ámbitos que carez el pueblu trabayador asturianu.

Por too ello, el nuesu homenaxe y alcordanza pa les muyeres y homes qu'intentaron asaltar el cielu. El meyor homenaxe, ¡Siguir cola llucha!
Un añu más,

PUXA LA LLUCHA DE LA CLASE OBRERA
ASTURIES NUN ESCAEZ

[DMR 2017] Actividaes del sábadu 14 d'Ochobre



Como yá anunciamos anteriormente, el DMR d’esti añu entamará’l vienres 13 con una proyeición y alcuentru-homenaxe con Maximino Roda dende les 19:00 nel Llar La Llegra. Pero’l sábadu 14 siguiremos con delles actividaes a lo llargo’l día.

La xornada va entamar a les 12:00 na Plaza’l Paragües, onde un añu más l’internacionalismu va tener el so espaciu: les delegaciones xuveniles desplazaes a Asturies van aldericar con nós y cuntar les sos perspeutives y esperiencies alrodiu’l turismu, asina como les sos problemátiques y consecuencies pa nós, la mocedá. Darréu, na mesma plaza, xinta popular, na qu’encamentamos a la inscripción previa en darreu.moceda@gmail.com.

Pela tarde, a les 17:00, ye turnu pal ochobre’l 34 dende una perspeutiva hestórica. Adrián Gayo, de la Fundación Juan Muñiz Zapico, va tar al frente d’un percorríu hestóricu pelos principales escenarios de la revolución, con entamu na propia plaza.


Yá pa rematar la xornada, a les 20:00 ábrense les puertes de la Sala Sir Laurens pal XIV Asturies Nun Escaez, con Kaos Urbano, Skontra, Ochobre y Los Monstruitos (8 anticipada, 10 taquilla).

miércoles, 27 de septiembre de 2017

[DMR 2017] Alcuentru-homenaxe con Maximino Roda



Siguimos presentando les actividaes d'esti DMR 2017,nesti casu la correspondiente al vienres 13 d'ochobre nel Espaciu La Llegra: a les 19:00 va proyeutase'l documental de Luis Felipe Capellín "Maximino Roda niño de la guerra", y de magar les 20:00 vamos cuntar col propiu Maximino, que mos desplicará les sos esperiencies.

Maximino Roda foi ún de los "neños de la guerra", qu'en 1937 colaron d'Asturies rumbu a la URSS: los "refuxaos" d'aquella época. Yá na URSS, participó nel Llagu Ladoga como voluntariu del Exércitu Roxu, clave pa la defensa de Leningrado.

Con too ello, conxugamos la memoria hestórica de la llucha antifacista nel nuesu país, asina como na Unión Soviética, nel centenariu de la so proclamación.

Bien pronto, ¡más actividaes!

jueves, 21 de septiembre de 2017

Pol drechu a decidir, pol internacionalismu: tamos cola llucha del pueblu catalán


Nos últimos díes tamos viendo cómo la mázcara del Estáu español ta cayendo dafechu: la demanda del pueblu catalán de dalgo tan simple como poder votar el so futuru, ta dexando unes consecuencies bien contundentes: detenciones, rexistros arbitrarios n’imprentes, medios de comunicación, sées d’organizaciones polítiques… asina como un despliegue policial esaxeráu, y l’intentu d’intervención económica dende’l gobiernu central.

Énte ello, vemos un movimientu popular cada vegada más decidíu a siguir alantre cola so demanda d’autodetermín, a nun dexase pisar pola bota policial ya institucional d’un Estáu español que quier ganar pela fuercia lo qu’enxamás quixo ganar per otres víes, amosando asina qu’en cualquiera de les sos formes, acaba siempres na sienda de l’aculturización y la negación de la soberanía de los pueblos.

Dende la Mocedá d’Izquierda Soberanista paeznos imprescindible solidarizanos y sofitar la llucha del pueblu catalán, porque yá nun ye namái una cuestión d’independentismu sí o non: los atropellos y actos represivos que permitamos güei en Catalunya, van afectanos mañana n’Asturies y nel restu de pueblos que componen esti Estáu.

De la mesma manera, les breches que güei consiga abrir el pueblu catalán, van trayer incertidumes y oportunidaes que tamién mos van a afectar pa bien o pa mal: puede abrise una escena na que poder avanzar nel camín de la soberanía p’Asturies, pero si nun tamos sollertes y organizaes, esa incertidume puede tornase a la nuesa contra en forma de recentralización y ofensiva aculturizadora. Poro, ye perimportante güeyar estos fechos dende una perspeutiva internacionalista, con tolo qu’ello implica: tar atentes a lo de fuera, pero tamién a lo de dientro’l nuesu país, y sobre too: organizaes pa reaicionar en dambes vertientes.

Nesi sen, queremos manifestar una vegada más el nuesu sofitu y solidaridá pa cola llucha del pueblu catalán, afitando la nuesa identificación col proyeutu de la Esquerra Independentista: construyir unos Païssos Catalans dende’l socialismu y el feminismu, con un proyeutu de clase y emancipador en tolos aspeutos, que tresciende una simple llucha pola independencia formal.

Tamos pol drechu a decidir de tolos pueblos que componen l’Estáu español, tamos pol movimientu popular que llucha por algamar la xusticia social y una verdadera democracia, tamos polo tanto col pueblu trabayador de Catalunya y cola so mocedá combativo.