Un añu más aporta’l Día Internacional de la Muyer Trabayadora y vien
pisando bien fuerte. Convocada la fuelga xeneral feminista a nivel
estatal, esti 8 marzu tien que convertise nuna xornada de llucha en
tolos ámbitos. Les muyeres, con más rabia que nunca y cola fuercia de la
sororidá, salimos a la cai.
Nel nuesu contestu, les moces
asturianes atopámonos nuna situación de crisis permanente, siendo
esplotaes como muyeres, como asturianes y como
clas trabayaora, asina como parte d’un colectivu mozu pol que’l nuesu
país nun puxa un res. Nun mercáu llaboral con considerables índices de
precariedá, les muyeres vémonos llimitaes a trabayos de menor
responsabilidá, mayor inestabilidá y peor remuneración. Encuestes
recientes afirmen que les muyeres cobren n'Asturies un un 26,3% menos
que los homes —la mayor brecha salarial de tol Estáu—. Nel ámbitu rural,
esta desigualdá vese tovía más acentuada. Al avezáu trabayu domésticu y
de cuidaos súmase'l trabayu n'agricultura y la ganadería, lleváu a cabu
ensin remuneración dalguna. Amás, nestes zones, la propia xeografía
dificulta l'accesu a les oportunidaes llaborales o de formación. Vemos
como resultáu nesti contestu la emigración non solo a les ciudaes, dando
llugar a la despoblación del mediu rural, sinon fuera d'Asturies, onde
nun ye raro que les muyeres véanse obligaes a aceutar trabayos más
precarios y peor pagaos. Pero la discriminación nun se llimita al ámbitu
llaboral, sinon que ta presente tamién nel tarrén estudiantil, nel
familiar, nel social. Y esto débese a una cadarma bien afitada que ye’l
sistema capitalista heteropatriarcal, que mos quier somorguiaes,
esclaves y sumises.
Por
too ello, dende Darréu llamamos a sofitar la fuelga feminista, a colgar
el mandil y dexar vacíes les aules, les cases y los puestos de trabayu
pa llenar les cais. Tenemos que parar por nosotres: les rurales y les
urbanes, les xitanes, les payes, les emigraes, les sexualmente oprimíes,
les racializaes. Y sobre manera, poles que nun tán: les preses, les
asesinaes. Y ye que si paramos nosotres,
para'l mundu. ¡Vamos facer hestoria! ¡Vamos frayar el patriarcáu!
para'l mundu. ¡Vamos facer hestoria! ¡Vamos frayar el patriarcáu!
12.00: Concentraciones nos ayuntamientos.
19.00: Manifestación na Plaza L’Humedal, Xixón.
No hay comentarios:
Publicar un comentario