jueves, 9 de febrero de 2017

La so arma: facismu y represión. La nuesa: unidá y organización




Nun vamos descubrir nada, namái remitinos a la experiencia hestórica: n’époques de crisis estructural del sistema capitalista, en momentos nos que la explotación de la clase trabayadora intensifícase col paru, los retayos sociales y la represión a la protesta, el facismu espoxiga como un arma col qu’evitar la emancipación del pueblu trabayador. El facismu nun surde porque sí: ta emburriáu mediática, económica y socialmente poles clases privilexaes, a les que-yos interesa esparder el racismu, la xenofobia, el clasismu, la homofobia… nes clases populares, y asina lo vemos anguaño col crecimientu de la ultraderecha en toa Europa.

Vemos cómo na Cuenca’l Nalón vien medrando esta llaceria nos últimos años, amparáu por grupos venceyaos a Ultra Boys, de la mesma manera qu’ocurre en Xixón énte la pasividá, cuando non complicidá, de les instituciones: baxo’l barniz d’ “antisistema” o d’ “ayuda a españoles”, escuéndese un arma bien útil pal poder, y que dende la mocedá combativo d’Asturies tenemos el deber de refugar.

Ye imprescindible la unidá, la organización y la llucha dende valores anticapitalistes, señalando a esti sistema capitalista, -y non a refuxaos, estranxeros, homosexuales…- como culpable de la situación que vive la clase trabayadora del nuesu país. Tamién dende valores feministes, ante la violencia estructural del machismu qu’acaba cola vida de milenta muyeres, y somorguia a otres tantes. Y por supuestu, dende valores soberanistes: de poner en valor la necesidá de decidir les nueses polítiques culturales, sociales, económiques, d’Asturies y p’Asturies, frente al centralismu y la uniformidá defendíu pol capitalismu más xabaz: el facismu. 

ESTI SÁBADU, TOES Y TOOS A LA FELGUERA
POR UNA ASTURIES LLIBRE DE FACISMU
ORGANÍZATE Y LLUCHA

No hay comentarios:

Publicar un comentario