La fin de selmana d’actividaes entamó’l
vienres nel CS La Semiente, con una charra-alderique na que la delegación
gallega (Isca!), falónos alrodiu la llucha xuvenil nel so país, principalmente
dende una perspeutiva d’anguaño pero tamién del percorríu fechu. Tamién hebo
oportunidá de sentir les reflexones de la delegación xuvenil allegada dende’l
País Llionés (Ruchar), pa posteriormente aldericar ente toles presentes,
entrugar duldes, y en definitiva arriquecenos col intercambiu d’esperiencies y
visiones.
A les 21:00 siguió l’actividá, con una Nueche
en danza & folk na que Cuatrolán, Tuenda y Los Collacios amosaron el so bon
facer enriba l’escenariu. Por segundu añu consecutivu, Darréu punxo enriba la
mesa la vertiente musical con más raigañu, dende una filosofía d’autoxestión y
de garrar pal presente y pal futuru los elementos vixentes de la nuesa cultura
tradicional.
El sábadu cuntamos de nueu con una bayura d’actividaes,
siendo la primera d’elles l’homenaxe a les y los revolucionarios del 34 nel
monolitu d’alcordanza a Belarmino Tomás. Nel mesmu, decenes de persones y les
delegaciones internacionales sintieron la intervención d’un compañeru de la
Mocedá d’Izquierda Soberanista, na que señalóse tanto la necesidá de siguir
poniendo en valor y faciendo alcordanza del pasáu, como tamién reivindicar qu’anguaño
la llucha sigue siendo imprescindible nuna Asturies onde la mocedá sufre les
consecuencies del capitalismu, el patriarcáu, y la falta de soberanía.
Recalcóse amás l’homenaxe a toles persones participantes nesos fechos
hestóricos, non namái a les cares más visibles.
Y depués del actu nel monolitu, l’actividá
tornó al CP José Bernardo, con una xinta popular cola qu’afondar na xermandía
militante y reponer fuercies pa tolo que diba venir darréu: la ruta hestórica,
y el XIII Asturies Nun Escaez.
El Parque Vieyu de La Felguera foi’l primer
puntu d’un percorríu nel que la hestoriadora Amaya Caunedo desgranó los fechos
más importantes de la revolución en La Felguera y Sama, dende los llugares
esautos onde asocedieron. Amás d’ello, lleóse un testimoniu d’un revolucionariu
del 34, participante n’aquellos díes de llucha.
La fin de selmana remató col XIII Asturies
Nun Escaez, nel que cientos de persones
esfrutaron de los conciertos d’Años de Plomo, Misiva, Escuela de Odio, Vendetta
y Skama La Rede. Amás de la música y la folixa, hebo espaciu pa una
intervención d’una compañera arxentina desplazada pa dar a conocer n’Asturies
la causa pola absolución de los petroleros de Las Heras, un casu evidente de
represión xabaz n’Arxentina. Tamién hebo
una intervención política a cargu de Darréu, de nueu amosando la doble vertiente
de reivindicación hestórica y de llucha presente qu’inspira’l Día de la Mocedá
Revolucionario, con especial atención a la llucha contra les agresiones sexistes en cualquier espaciu de la sociedá en xeneral, y nos folixeros en particular.
Dende Darréu facemos una valoración positiva d’estes
actividaes, con una bona participación popular y meyor ambiente, pero esto nun
para: el DMR’16 sigue alantre esti sábadu 22, con una charra perprestosa:
Feminismu, cuestión de xéneru y medios de comunicación, a cargu d’Anna Gabriel.
Too esto ye posible gracies a moces y mozos
que, como tu, tán esmolecíes pola situación del nuesu país, y lluchen por
cambiala dende’l soberanismu, el socialismu, y el feminismu. Nun lo duldes,
¡axúntate a la mocedá rebelde!
PUXA OCHOBRE’L 34
PUXA’L DMR
ASTURIES NUN ESCAEZ
No hay comentarios:
Publicar un comentario