Esti domingu Xixón acueye un añu más la manifestación antitaurina entamada por ANADEL, en rempuesta a la llaceriosa Feria de Begoña na que, de nueu, la tortura y la barbarie van vendese como un espectáculu, l'últimu d'estes característiques que queda nun país como Asturies, nel que tradicionalmente la práutica de la tauromaquia ye nula.
Dende una perspeutiva de mocedá, paeznos llamentable que dende l'Ayuntamientu de Xixón s'apueste por un modelu cultural que dexa siempres de llau les manifestaciones artístiques y culturales asturianes (tradicionales y nueves), promoviendo actividaes como les corríes de toros, que xeneren cero interés na xuventú del nuesu país, y quedando güérfanos de modelos d'ociu y cultura alternativos al "pan y circu" col que mos bombardien.
Tamién dende una perspeutiva soberanista, ye evidente qué interés puede tener el caltener vivu de xeitu artificial esti eventu: afondar nuna de les munches formes d'aculturación que carecemos, al traviés d'ún d'esos elementos que quieren vender como "lo español", como una "cultura española" que nun esiste, formada básicamente por elementos culturales de los distintos pueblos del Estáu, deturpaos y caricaturizaos davezu.
Ye por ello que dende Darréu llamamos a participar na manifestación con entamu a les 16:30 na Prazuela San Miguel de Xixón, y más concretamente dientro'l bloque #LluchandoPolaSoberanía: pola llucha escontra'l maltratu animal, y por una Asturies llibre d'aculturación.
No hay comentarios:
Publicar un comentario