miércoles, 24 de agosto de 2016

1937-2016: Dignificar la memoria, construyir el futuru




Un 24 d’agostu de 1937 les fuercies obreres y progresistes d’Asturies firmaben el decretu pol que’l Conseyu Interprovincial d’Asturies y Llión convertíase en Conseyu Soberanu, asumiendo plena autoridá militar y civil colo qu’ello supón: gobiernu propiu dividíu en ministerios –Guerra, Asistencia Social, Sanidá, Obres públiques, Agricultura, Comerciu….-, organización xudicial propio, mandu militar, emisión de monedes y sellos…

Poro, tenemos nestos fechos, en plena guerra contra’l facismu, un exemplu más de la clase trabayadora como motor y propiu gobernante del nuesu país, con un fechu más a destacar: l’exemplu d’unidá, pesie a les naturales discrepancies estratéxiques que tamién pudieren surdir enantes, durante y depués.

Con too ello, dende la Mocedá d’Izquierda Soberanista reivindicamos como perimportante non namái recuperar y esparder estos y otros tantos fechos, sinon tamién dignificalos al altor de la so importancia. La memoria hestórica sigue siendo una estaya con abondes deficiencies nel nuesu país, quedando de mano d’iniciatives populares cualquier avance, énte la pasividá, cuando non refugu, del ámbito institucional.

Per otru lláu, tamién hai que destacar que, va non tanto, les fuercies obreres asturianes nun dubiaron en declarar la soberanía como la opción que meyor consideraron pal desendolcu de la resistencia antifacista nel nuesu país. Anguaño, dende otres formes y n’otres circunstancies, esa soberanía ye pernecesaria: llibranos de les imposiciones del Estáu español, de la Xunión Europea, de la OTAN, del FMI… en definitiva, algamar qu’el pueblu trabayador asturianu seya’l responsable cimeru de les decisiones nel so país, espéyase como un oxetivu irrenunciable énte’l sucursalismu, la inoperancia, la inxusticia y la explotación que güei carecemos.

GÜEI COMO AYERI, ASTURIES NUN ESCAEZ
PUXA’L CONSEYU SOBERANU

No hay comentarios:

Publicar un comentario