Sofitamos al pueblu de Bretaña

El prósimu sábadu 19 d’abril va cellebrase en Nantes (Naoned, na fala bretona) un manifestamientu en favor de la re-xuntanza de Bretaña.

Dende Darréu queremos manda-yos un mensaxe a los nuesos hermanos celtes, un “puxa” pola so llucha escontra’l xacobismu xabaz imperante nel Estau francés qu’arrequexa les diferentes nacionalidaes esistentes dientro de les fasteres de só.

Asturies y Bretaña tienen similitues culturales pola so identidá celta, y similitues na represión exercía por un Estau foriatu y opresor empeñau en francer los raigaños y n’estrapallar la llingua llariega. Por eso dende esti pequeñu País solidarizámonos col pueblu bretón na so xera de puxar pola so dignidá bregando pola xuntanza de los territorios que conformaben el Ducau de Bretaña. Actualmente el país bretón atópase dividíu nos cuatro departamentos que conformen la “rexón” de Bretaña y el departamentu de Loira Atlánticu que ta dientro de la “rexón” de los Países de Loira.

Dende fai cuarenta años la sociedá bretona lleva manifestándose escontra d’esti esfarrape identitariu que solo fae atentar escontra la hestoria y la dignidá d’esti pueblu en favor de los intereses parisinos y centralistes. La cellebración del prósimu sábadu tendrá llugar en Nantes pol so significau hestóricu. Nantes foi la capital hestórica de Bretaña, güei, dende 1955, alcuéntrase dientro de la “rexón” de los Paises de Loira. Les caberes encuestes realizaes pol institutu LH2 pa la prensa espeyen el sentir mayoritariu esistente pola reunificación, nos cuatro departamentos bretones el 57% de los encuestaos taríen a favor, mientres que nel departamento de Loira Atlánticu sofitaríen esta opción un 63% de los encuestaos. Estos datos nun faen más qu’emburriar más al pueblu bretón pola via democrática a conquistar el so destín d’algamar otra vuelta una Bretaña xunida ante’l gobiernu de la República Francesa.
 

Poro, dende esta organización encamentámos-yos a toos los collacios d’acullá’l Cantábricu a crear un marcu d’aición, colaboración y sofitu dientro del Arcu Atlánticu, a emplegar los nuesos llazos culturales comu ferramienta na llucha pola lliberación de les nueses naciones. 

¡Puxa Bretaña llibre!
¡Puxa Asturies llibre!
¡Puxa les naciones celtes en llucha!